每年的中學文憑試，都是決定考生升學以至就業前途的一大考驗，不過2020年度的DSE考生，卻因為疫情的影響，面對着前無故人、亦希望後無來者的難關。考試日期和內容一再修訂，全體考生都受到波及，然而「沒有比較就沒有傷害」，一場考生之間的「鬥慘大賽」，就在開考前悄悄開始......

物理科考生

「邊個夠我慘？原本個文憑試時間表，我4月7號考完數學之後，去到16號先至考 physics，已經一早諗好晒點樣用呢9日嚟做最後衝刺。依家？5月5號考完中文卷三，7號就要考 physics 啦，衝刺？沖廁就趕得切。」

跨境考生

「邊個夠我慘？為咗可以考試，我已經提前兩星期返嚟，乖乖地做足檢疫，諗住可以準時考試鬆一口氣，點知 DSE 遲考四星期，我又無得彈出彈入過關，上返去又要檢疫，落返嚟又要檢疫，唯有再自閉多幾星期。」

「屙佬」勁考生

「邊個夠我慘？人人都話我『得把口』、『講你就叻』、『死都拗返生』、『講就天下無敵』，即係點？即係我口才了得，『屙佬』口試就係我嘅『食糊科』。遲考、戴口罩考我都唔care，但依家口試都 cut 埋，連考都唔畀我考，係咩玩法？」

悲觀考生

「邊個夠我慘？改完又改，肯定會越來越衰，世界末日㗎喇，遲下成個 DSE 都 cancel 埋，試都唔使考，咁就唔使驚啦，嗚，我想入U呀，係咪計平時分？係咪會計埋操行？我遲咗一日到，會唔會扣分㗎？」